Emmental Blog

Neues, Geschichten und Abenteuer aus dem Emmental

Wiehnachte ir Chiuche – eine berndeutsche Weihnachtsgeschichte

23.12.2013 | von: Christian_Billau | Tags: Emmental News, Geschichte | 0

Mit einer berndeutschen Weihnachtsgeschichte aus dem Buch „Emmelis Wäg“ wünschen wir Ihnen allen von Herzen frohe Weihnachten und ein gutes und gesundes neues Jahr. Wir freuen uns, wenn Sie unsere Beiträge auch 2014 mit Interesse verfolgen werden!

 

Wiehnachte ir Chiuche

Di ganzi Nacht het es gschneit u gstrubuusset. Es wiehnächtelet … Wi aui Jahr isch e Buur us der Gmiin a der Reihe, für ne Buum z stifte. Dasmau isch der Rüttiboder dranne, un es het fei echli e Tanne bbruucht, für bim Tuufstii vooren ufzsteue.

P1040252

 

Sit jehär isch es Bruuch gsi, dass am 24. Chrischtmonet d Gmiin, d Schuele u d Sunntigschüuer zämethaft ir Chiuche tüe fyre. Der Rüttiboder lächlet uf de Stockzäng, won är dä schön glychmässig dick Tannebuum am Namittag i d Chiuche bringt. O der Mäucher het glächlet, warum ächt? Het ers gmerkt, dass dä Batzechlemmer s allne wott ziige, dass er, wen er a der Reien isch, nid tuet gyte. Item, am Namittag vo däm 24. sy d Schüuer u zwe Chiucherät aagrückt, für di Tanne i Glitzer u Glanz z verwandle.

Weihnachten

Emmeli het nid ddörfe gah. Es mues der Büüri häufe Züpfe mache. D Frou Rohrbach hets ddüecht, das syg am Aabe früech gnue, wen es de mit der Jumpfere u em Ueli i d Chiuche chönn. Gschyder hie öppis Schlaus mache, weder der Namittag unnütz verplämperle. «Emmeli, nimm di grossi Tiigschüssle u d Chuchiwaag vüre», befiut d Meischtere. «Nächhär machsch Zuetate für ds 3-fache zwäg.» 3 Kilo Simumäu sy nötig für di Portione, 300 Gramm Anke, 60 Gramm Hebi, 12 chlyni Löffeli Sauz, 2 Liter lööji Miuch u 3 Eigäub für zum Aa-stryche. Bachzyt 50–60 Minute bi 180 Grad im Elektroherd oder mit zwone Wedele im grosse -Bachofe. Im ganze Huus het es fein gschmöckt. Ueli isch o -iinisch cho der Chopf zur Chuchistür ycheha u het gstuunet ab dene drei schöne häubruune Züpfe. «Mannevouch isch nid gfragt», het d Büüri uuston-achset. «Nu ja, de gahn i haut ume», siit Ueli.

Emmeli het sech gfröit wi scho lang nümme, wos ändtlige mit der Jumpfere Heidi u em Ueli i d Chiuche darf. Es het es Gedicht ddörfe lehre uf das Fescht u s drum der Jumpfere uf em Wäg no iinisch ufgsiit. Scho vo wytem gseh si der Glanz vom Buum dür d Chiuchefäischter düre. Und oh wi schön, wi fyrlech isch es ersch i der Chiuchen inne. Iis Cherzli flackeret schöner weder ds angere. Ängelshaar ziere d Tannescht, roti Öpfeli hangen a de Zweige, Chrugle i gäub u rot – u zoberscht uf em Tannespitz glänzt e grosse Stärn, wahrhaftig wi der Stärn vo Bethlehem …

D Schüuer hii sech im Chor voore gsädlet. Es jedes het gstuunet, glost und ufpasst. Orgele u Trumpete hii d Chiuche erfüut mit himmlische Tön. D Gmiin het ygstumme i ds Lied ‹Der Heiland ist -geboren, freu dich, du Christenheit, sonst wärn wir ganz verloren in alle Ewigkeit›.

Itze isch Emmeli dra cho mit sym Gedicht.

I mene arme, aute Huus
schynt es Liecht zum Fäischter uus,
u das Liechtli siit de Lüt:
«Chömit gschwing u förchtet nüt.»
He, da wii mir aui gah u vor das chlyne Fäischter stah.
Luegit, i däm aute Huus flüge Ängeli y u uus.
U im Stäueli, lue doch ou, hocket en auerliebschti Frou,
het es chlyses Ching im Arm, lyrets y u bettets warm.
Ängeli flüge um ihns här.
Wär isch ächt das Chingli, wär?
Das mues üse Heiland sy,
är isch doch cho für di u mi … (M. W.)

bäraukirchli

Der Ueli höcklet ganz chrumme i mene Bauch u fröit sech a Emmeli, wo das Gedicht so innig vortreit. Der Pfarer het us em Lukasevangelium d Wiehnachtsgschicht vorgläse, u zum Abschluss vo der Gmiinswiehnachte hii si no ‹Es ist ein Ros entsprungen› gsunge. Ueli, Emmeli u d Jumpfere sy nächhär zäme dür e Schnee gstungget, em winterleche Rüttibode zue. D Nacht isch stockfeischter gsi, aber bi dene drü het es Liechtli wytergflackeret. Der Buur, d Büüri u der Markus sy später nachecho. D Frou Rohrbach het gluegt, dass ihre Suhn so wenig aus müglech Kontakt het mit em Verdingching. Es isch ja schliesslech us ere mingere Näschtete …

Aus dem Buch „Emmelis Wäg – e Läbesgschicht, Marie Rüegsegger, Zytglogge-Verlag, 2013

Bilder: Verena Zürcher/Archiv



Kommentar schreiben


 
 
Kommentar



Kommentare

© Tourismus Emmental 2011 | Datenschutzerklärung